صح معدان

شبابيك 38 shababek

iraq-khaliji21-01

عارف مأمون/الناصريه
arf_2005@yahoo.com
هذا أنا فمن انت…؟
صح معدان
بس شوف المعيدي اشترك من بنيان
آنه القدمت نور الحرف للكون
انته اشقدمت جاوبني بالبرهان
مجبور ارد اقارن حتى تفهم زين
وحط حد الغرورك وكشف البهتان
آنه انتج حضاره وشاهدي التاريخ
وانته انتاج فكرك مبني عل العدوان
آنه اول مسلّه الشالت القانون
بوكت فوضى حياتك تشبه الحيوان
صح معدان …

بس لجل الوطن لمعيدي من تنخاه
يركض للمنايه ويفتدي الاوطان
أمس بالحد شواهد عندي من هديت
بوكت انته بنوادي العاصمه سكران
مو قصدي ارد اذمّك لو أبيّن اعيوب
لكن من اقارن يطفح الميزان
انتصر دمي اعله سيفك من جنت طاغوت
والمعيدي السجنته انتصر عل السجان
ولساني الكَطعته بحقدك المسموم
خضّر بالحلك من دمه ميت السان
صح معدان …
بس نعرف نسامح والدليل اليوم
كَدرنه..وقابلينه السوء بالاحسان
المعيدي المثلنه بروحه يفدي الجار
مو مثلك تحزّم يذبح الجيران
ما فتّش الجناسي مثل ماسويت
اخوي انته سواءا علي لو عثمان
انه ابن الوطن لمعيدي ابن الهور
اشرفها العروبه وتاج عل العربان
انه ابن الجنوب الجذري واصل اور
عنواني شمس ..چا انته يا عنوان ؟

**********
أكميله

عارف مأمون
arf_2005@yahoo.com
كانت الرابعه لأبوها…وكان يمنّي النفس بولد يحمل اسمه ويكون سند له في الكبر وخيمه لاخواته الثلاث لكن الله شاء ات تكون كميله أو (أكميله )كما يحلو له تسميتها الرابعه وخاتمة ذريته…تزوج البنات الثلاث ومرض الوالد بامراض شتى فكانت (اكميله ) نعم السند والعضد له ولأمها..اتخذت لنفسها مكان في منطقة النهضه ببغداد التي تبعد مسافة النصف ساعه عن بيتها لتبيع الشاي والكعك على (بسطيه ) لتجمع ثمن الدواء والغذاء بشرف وأبت ان لا تتزوج وتترك والديها دون معيل…كان يكنيها (ام علي ) تحببا ولفرط شجاعتها..وفي يوم دامي صعدت روح اكميله الى بارئها بتفجير مجرم على الانسانيه..ليأتي الوالد المنهك للمكان ويرجع بها للبيت اشلاء….

أكميله
ظاملچ محبس شذر
منتظرچ اتعرسين
مابعته حتى بوكت ماعدنه
صم اطحين….
يكميله..ماكو زلم
بالنهضه ماكو زلم ؟
لمن تفجّر لغم
وطشريتي شرف
الشيله صارت وصل
غطتچ عن العين
يكميله يا كعدتي..
عوضتي فكَد الولد
شنهو الولد (يم علي )
انتي عوض خمسين
چا ليش مستهدفه..
البسطيه كرسي حكم
لو چايچ اشكد حلو
ذبحوه دعاة الدين ؟
شو ما سمعنه حضر
لو سقطت العاصمه
بس خبر عاجل طلع
ماتوا عراقيين !
اي بويه احنه خبر
تتناقله المكَبره
ودمنه صفه للنشر
للزين والموزين
ما حسّبت (يم علي )
عل الارصفه معركه
وانتي بطرك غيرتج
للمعركه تروحين
شمخلي بيچ الغدر
ردت ألم بس الوجه
ما شفت بس كَصتچ
ونكَطة حيه امبسمره
رغم العصف والشضه
ظلت تحامي الجسد
ما ترضه تنشافين
يكميله ردتچ ذخر
لو غرّبت للنجف
تبرين وي النعش
وكل دمعه منچ أجر
اتبرد كَبر مسكين

*********
قصيدة لقصة واقعية
زوجة غانم…
ابكتني قصتها فكتبت من اجلها

أنها زوجة لاحد ضحايا الارهاب الذين زهقت ارواحهم ظلما بعد احداث العنف في العراق عام 2005
تحدثت بمرارة بمقال عن حالها وحال اطفالها الثلاث..اصغرهم (مصطفى) كانت حامل به وولد بعد شهرين
من استشهاد والده..اشد مايؤلم في قصة هذه المرأة تقول ان اولادها لحد الان لم يصدقوا موت والدهم ويتحدثون عن عودته وعند نجاحهم في المدرسة نذهب لزيارة قبره ويأخذون (الشهايد) معهم لغرض اخباره بنجاحهم ويتحدثون مع القبر فكانت هذه الرثائية لقصة حقيقية يشهد الله تبكيني كلما رجعت اليها..

صباح الخير بابه اشعجب ماريدت..
صار سنين منك ماسمعناها ؟
نجحنه اول نبشرك جينه متعنين
بلهفه والشهايد ليك جبناها
هذني اخدودنه اعله الكَبر محطوطات
بوس اخدودنه البعدك نسيناها !
من ماي الورد اكثر نطش دموع
وفيضنه الكَبر لمن بچيناها
اكعد بويه اكعد امنه راح تموت
حلفت تبقه يمك لو تجي وياها
هاي أمنه الكَبل عدّك بعز الروح
معقوله الكَبر خلاك تنساها ؟!
وابنك مصطفى يعتب عليك هواي
منك بس صور بالبيت شافاها
مابطل سؤاله اشوكت بابه يعود
محد كَبله هيج السفره سواها !
وحدنه بوكت غادر عفتنه شلون
المذله خلاف شخصك ياما شفناها ؟!
وقعنه الشهايد فدوه بابه ارجوك
حقل اسمك فراغ شلون ترضاها !!
تعال اويانه ارجع يمنه نام هناك
هاي المكَبره اتسكت ضحاياها
بيتك ماله باب المكَبره بلا باب
ماتقبل نشوفك هاذه معناها
سمعنه من البعض كالوا ابوكم مات
وغضينه النظر چن ما سمعناها
الزفّك للكَبر مسلم تكَول الناس
ومن منّه خذاك الشغله افتاها
وكَبل لاصله يمكن شح عليه الماي
توضه بدم بريء وراح صلاها !!
…………………
نشرتها قبل سنوات في عدة مواقع الكترونيه
واعيد نشرها لان قوافل الشهداء لن تتوقف في بلدي المظلوم
عارف مأمون
…….
*******

حال سماعي حديث هذا العراقي المظلوم مع الحائط لم اجد غير القلم
لاكتب بحرقة وبشكل ارتجالي هذه السطور المتواضعة عن هول المشهد
ارجو ان تنال رضاكم وتكون صوت في مواجهة الظلم وقول للحقيقة
مع شكري وامتناني

الشاعر عارف مأمون/الناصرية

شكوى للحايط !

يل الحايط اسولف خوب ماتزعل ؟
سولفنه گبل وي ناس مو حيطان
ماسمعوا حچينه ومالگينه الحل !
يل الحايط كَصدتك حتى اشكي الحال..
دگت بالعظم مابعد نتحمل
ربعنه ال بالحكم من نحچي يغتاضون
وزحمه من السياسي اليوم لو يزعل !!
بطلنه بعد ماردنه منهم خير..
چا ليش بسببهم نبقه نتكتل ؟!
دوّر بالكتل يالحايط اترجاك
تلگه المنبطح والفاسد ومختل
وتلكَه اشراف بيهم هذا شي معلوم
بس صار الشريف ابينهم اعزل
اولاد الخايبه اعله الساتر يطيحون
وأهلهم من وراهم عل الخبز تنذل !!
بوكت واجب وطن نتقدم احنه الغير.
وبوكت الحقوق نصير موش أول !
معدان وفرس وهنود مدري منين ؟
يسمينه (الشريك) واحنه نحمي الكل !
من يوم (الصنم) لليوم نطي ارواح
بوكت اهل (اليول) بالفزعه تتختل
ما عيّر اخوي الحاله تفرض هيج
لان وكت الحقيقه نكَول مانخجل
يالحايط اعول اعليك تسمع هاي
ولاعول اعله ساسة ابلد يتهجول !!


عفية شعب

-عارف مآمون
عفية شعب بيه العجايب مو عجب
جمعة ندم
جمعة غضب
أنواع عدنه من الجمع
كل وحده عنوان وخطب
جمعة صمت
جمعة شغب
جمعة حواسم بالبلد
جمعة سلب
عفية شعب
مرة لطم … مرة لعب
الت
مرة يصفك للصنم
مرة يشجع المنتخب
عفية شعب
نايم على أبيار النفط
وليهسه يطبخ بالحطب
الت
عفية شعب
مثل الجمل عاگول ياكل للأسف
وشايل على ظهره ذهب
عفية شعب
حتى بوكت بيده الأمر
تيّه احسابه وما حسب
وحتى البعض من أمّنه
ونطاه صوته وصعَّده
الت
بس يوصل الكرسي گلب
نهرين عنده وما زرع
والغربة بيه زرعت رعب
عبوات . ..والغام … وحزم
ما قصروا أهلي العرب
دم ومآتم حمّلت
وصار الحصاد من الركَب
يابو لهب …
دزِّنه من عدكم حطب
وارتاح لتشيل الحمل
حماله عدنه اعله الطلب
بس يا شعب …
معذور من صابك تعب
ثلاثين مرَّن بالألم …
بالجوع مرة … وبالحرب
جيش القدس … جيش الفرس
جيش السما … جيش الأرض
الت
وجيوش أنواع ورتب
بس يا شعب لا تستلب
فك عينك وشوف الدرب
ميّز العدو … من المحب
ميّز الصدك … من الجذب
ركِّز عدل … من تنتخب
الشغلة لازم تنحسب
الت
هذا عدل … لو مو عدل ؟
أصل وفصل … لو بس شكل ؟
من الكتل … من النخب ؟
بس للوطن … لو للحزب ؟
ميهمك شلابس بعد . ..
قاط أجنبي … صاية وعكَل
عمامة وبشت
المهم شايلَّه عقل
والمهم ميبيع البخت
والمهم … والكَلش أهم
صادق يحافظ على الشعب

——-
المهمّش !!

ياهو الهمّشك من الله لاينطيك
مربّع بالعراق وتصرخ مهمّش ؟
قسمنه وياك كلشي النفط والتمرات
ونفديك بنفسنه مرار من ترمش !
نبنيلك وطن وانت بصلافة عين
كلما ساس يعله بچفّك تفلّش !
فضلّت اعله اخوك التركي والشيشان
ودخلته اعله بيتك خاف يستوحش !
دنّس كلشي بيك وانت راضي بهاي
بس أحنه الغيارى بهاي نسحگ عش
معدان وفخر من ننحسب معدان
المعيدي اصاله وانت بيك الغش
شفتنه شلون نفزع فزعة الشجعان
بوكت ربعك نسوك وأيّست كلش !
لبعمان صبّح ولشرد لأربيل
وترك بيك الدواعش والكفر ينهش
متروسين غيره ونخوه من عباس
مابينه اللزم سرگيهن ويرعش
انساگن للاسف نسوانكم للذيب
وچبيره اعله الجنوبي يشوفها ويسكت
اخو خيته وعلي هد هدة الخيال
مو چن بالرمادي ابيته چن حلّت !
المعدان الشفتها شلون فزعوا ليك
كَبل نگلة جدمهم روحهم وصلت
ماختلوا ولك لو فخخوا حيطان
تلكَوها بصدرهم والگصص لمعت
اجوك بصف رصاص وهامه فوك الغيم
مو مثل الجبتهم دوني ومسربت
اجوك بلا قناع وجوهم عنوان
وكَاعك من غزوها بدمهم تروت
عارف مأمون

———–
صيدة لقصة واقعية
زوجة غانم…
ابكتني قصتها فكتبت من اجلها

أنها زوجة لاحد ضحايا الارهاب الذين زهقت ارواحهم ظلما بعد احداث العنف في العراق عام 2005
تحدثت بمرارة بمقال عن حالها وحال اطفالها الثلاث..اصغرهم (مصطفى) كانت حامل به وولد بعد شهرين
من استشهاد والده..اشد مايؤلم في قصة هذه المرأة تقول ان اولادها لحد الان لم يصدقوا موت والدهم ويتحدثون عن عودته وعند نجاحهم في المدرسة نذهب لزيارة قبره ويأخذون (الشهايد) معهم لغرض اخباره بنجاحهم ويتحدثون مع القبر فكانت هذه الرثائية لقصة حقيقية يشهد الله تبكيني كلما رجعت اليها..

صباح الخير بابه اشعجب ماريدت..
صار سنين منك ماسمعناها ؟
نجحنه اول نبشرك جينه متعنين
بلهفه والشهايد ليك جبناها
هذني اخدودنه اعله الكَبر محطوطات
بوس اخدودنه البعدك نسيناها !
من ماي الورد اكثر نطش دموع
وفيضنه الكَبر لمن بچيناها
اكعد بويه اكعد امنه راح تموت
حلفت تبقه يمك لو تجي وياها
هاي أمنه الكَبل عدّك بعز الروح
معقوله الكَبر خلاك تنساها ؟!
وابنك مصطفى يعتب عليك هواي
منك بس صور بالبيت شافاها
مابطل سؤاله اشوكت بابه يعود
محد كَبله هيج السفره سواها !
وحدنه بوكت غادر عفتنه شلون
المذله خلاف شخصك ياما شفناها ؟!
وقعنه الشهايد فدوه بابه ارجوك
حقل اسمك فراغ شلون ترضاها !!
تعال اويانه ارجع يمنه نام هناك
هاي المكَبره اتسكت ضحاياها
بيتك ماله باب المكَبره بلا باب
ماتقبل نشوفك هاذه معناها
سمعنه من البعض كالوا ابوكم مات
وغضينه النظر چن ما سمعناها
الزفّك للكَبر مسلم تكَول الناس
ومن منّه خذاك الشغله افتاها
وكَبل لاصله يمكن شح عليه الماي
توضه بدم بريء وراح صلاها !!
…………………
نشرتها قبل سنوات في عدة مواقع الكترونيه
واعيد نشرها لان قوافل الشهداء لن تتوقف في بلدي المظلوم
عارف مأمون
…….
ملاحظة ارسلت القصيدة على رابط الموقع لكنها لم تظهر لا اعرف ان كانت هناك مشكلة في الرابط ام تم تغييره ؟! تحياتي وتقديري

————
جنوبي
الى النكره طه اللهيبي

يلهيبي الحچي ميّكبر الانسان
ولا عمر الصياح يحقق الغايه
حط جدك اكَبالي وجدي يحجي وياه
وراح نشوف ياهو اليرفع الرايه ؟
اشعندك انت كَلي من الاصل شتكون؟
حتى اتمس اصولي وتفخر بهايه !
آنه ابن الكتب اول حرف بالكون
بوكت جدك تغوغي بحلكَه الحچايه !
بوكت اعمه كَلب وعيون يبن لهيب
آنه الشرّعت للناس القرايه
مابات اعله كَاعي المحتل وذليت
بالعشرين ألي الشاهود والرايه
ماعيّرك ولك مو انت كلك عار
يلمخلي خواتك راحن سبايه
باجر جم اصل عدّك تفاخر بيه ؟
كثرن والدواعش كَلبو الأيه
من ياعرب انت وصاحبت شيشان
قوقاز وترك وافغان چم سايه ؟
ولو تشبچ عليك وضعت بين البين
مادام اعله بيتك طبّوا اهوايه ؟!
مو مثلك ولك ماراضي انه بهاي
شالتني الحميه ورايح عنايه
استرلك شرف يالماسترته بيوم
واطهّر بيت ابوك وثوب الولايه
ضحايانه التطيح بكَاعك شيردون ؟
غير تصون عرضك من الحيايه !
جنوبي آنه الاصل والفصل والتاريخ
واسكّت من يريد يشوه الثايه
………..

اعزائي ..اخص موقع شبابيك الرائع بهذه القصيدة التي انتهيت منها للتو
وهي رد على تخرصات النكره طه اللهيبي..
ارجو ان تنشر بصفحة منفرده لان موضوع القصيدة يستحق ذلك
لأني ارسلت قصائد على ايميل الموقع ولم تظهر
مع فائق الشكر والامتنان
الشاعر/عارف مأمون/الناصريه

————-
عبد الزهره

ندمه من اطيح دمعه..
وماكو ادين
وفشله من اجوع عمرك..
وانت ابن الرافدين
الجوع كافر..
يعني كفار التجوعك
الدين امان..
يعني كل واحد يخوفك
ماله دين !
راح اصاحب عنكبوت
عنكبوت !!
بلكي يبنيلي ولو بالشجره بيت !
وراح ادخل دوره باقفاص البلابل
بلكي اتعلم لغه مابيهه موت
وصوتي يتحول نشيد
حتى من اغضب اغرد..ما اصيح !
وما اصرّخ باعلى صوت
وكون ترهم ابني مادخله مدارس
بيهه يتعلم جذب ضمن المناهج
يقره دار…
وعمره يبقه بلايه دار!
ويقره جارك ثم جارك ثم جارك ثم اخاك
وجار يذبح جار والموضوع عادي !
واللطيفه..والطريفه..والمصيبه
ابني عبد الزهره يقره
الوطن واحد
الشعب واحد
الدين واحد…
وفتوى تصدر بيه ميطب الرمادي !!
…من قصائدي
تحياتي وتقديري لشبابيك الرائع ولكل نفس خيّر ومحب للعراق

عدد الزيارات: 11226 ,

الكاتب shababek

shababek

مواضيع متعلقة

38 تعليق على “صح معدان”

  1. المعدان شرف وغيرة يس الدواعش ومن يحتضنهم وحوش مفترسة وانشاء الله منقرضة كميله يم علي شهيدة ولروحها ولارواح شهداء العراق جنان الخلد انشاء الله والفاتحة لارواحهم جميعا وانا لله وانا اليه راجعون

  2. حسن العلي

    الشاعر المبدع عارف مامون
    اقبل اناملك ايها الانسان الراقي الاصيل

  3. قصيدتين معبره وتستحق ام علي دمعة العين بس انا اساءل بهذا الوطن اشكد اكو ام علي ام الغيره وايش تخاف منها الثعابين كان الله في عون ابوكميله والشعب العراقي المعيدي وندعوه بحق هذا اليوم ان يكسر شوكة المجرمين وكل من يكيد للعراق وشعبه بان تكون عاقبته كعاقبة بني اميه .

  4. غير معروف

    أقسم بالله العظيم كلما أقرأ قصيده أكميله اذرف الدموع إنها قصيده حيه باقيه وشاهد على تعرضنا للظلم والقتل بمرأى العالم المتحضر وخذلان الأخ والصديق وكأنهم يتلذذون بدمائنا وكميله واحده من ملايين.

  5. معدان مثل روافض علينا ان نرفع رؤسنا عندما نسمع فهما عز وشرف وغيرها ذل وعار

  6. ابن الرافدين

    الى عمير
    لما قرايت اسمك اتعوذت باسم الرحمن , والرافضه لوكانوا حضر لو معدان
    مايهم لان الغرض هو نكون من جند الايمان , لكن انت واسيادك مثل ابن سفيان
    نتاجهم خزي وعار والعار يوم شرد من ارض المعركه عمير وشردته اصبحت نيشان
    هذا اليوم يصادف ولادت اخو الرسول وصاحب السيف الي ماعرف غير النصر بقوة الله وعون من الجان , انظر حتى من اسمك استعيذ بالله لان اسمك يذكرني شصار بسقيفة ساعده من تامر واصبح لداعش نهج على طول الزمان .

  7. عارف مأمون

    أقبّل جباهكم احبتي في شبابيك الرائع المعبر عن صوت العراقيين الشرفاء..اصافح بقلبي صادقا كل الاحبة الذين طوقوني بشهاداتهم وكلماتهم الرائعة..اسأل الله ان يعم الامن والامان لبلدنا العزيز وينصر جيشنا الباسل على قوى الكفر والارهاب..مع جل تقديري
    اخوكم/ عارف مأمون

  8. الله اشكد روعة هذه القصيدة وعاشت ايدك يامبدع وهذه مو غريبه لان انت من مدينة المبدعين الناصرية الحبيبه تحياتي

  9. عارف مأمون

    السلام عليكم..احبتي في موقع شبابيك الرائع
    اهديكم قصيدتي الجديده حيث تعذر علي ارسالها بشكل منفرد
    حيث دأبت ان اخص هذا الموقع العراقي المعبر عن صوت العراق الجديد
    بكتاباتي الجديده..
    تقبلوا فائق الود والتقدير

    الصحبة
    ما اصاحب واحد يعلمني تقوه..
    وللطيور الغافله ناصبله عبوه !
    وما اصاحب واحد يسطّر كلام…
    وبالفعل ميكون قدوه
    آنه اصاحب واحد اليشرب عرك…
    عرك كَصته اليطيح
    وهوّه ينحتله رغيف اعله الرصيف
    من الفجر لآخر اذان يصيح حي اعله العمل
    وآ نه اصاحب واحد يسلّب أمان من الدعاء
    وما اصاحب واحد يدوّر امان من السلاح
    وميت رشاشه وراه !
    آنه اصاحبلي فقير أنقد قميصه من الدبر..
    راودته الدنيه بس عاند هواه
    وما اصاحب واحد يوزّع صكوك من المظاهر والرياء
    وقسّم الجنه اعله كيفه تكَول وارثها من ابوه !
    وآنه اصاحبلي منصه..
    بيتها بلايه زحاف
    وما اصاحب أي مقاول بيته زاحف عل الرصيف
    وآنه اصاحبلي كنيسه أدين لله
    وما اصاحب أي مؤذن يشتم العباس ويزور الحسين !
    وراح اصاحب عنكبوت
    عنكبوت…بلكي يبنيلي ولو بالشجره بيت !
    عدّي بيت اعله الارض لمّن اموت !
    واحترم عصّة معلم..
    رسمت بأيدي وشم صورة ابوي
    واشرتلي اعله الطريق
    واحتقر كل بندقيه اتذل جبين
    من اجل كرسي الضروره
    ومن اجل قائد يوكَفنه اصطفاف
    وهروله ويس يم لمن يطلع قبيس !
    وما اريدن قائد ايكَلي وجوبا..ركضة طويريج
    وهوّه حسباله الركض كَطعة طريچ !!
    اليركض يلبي دعاء..
    وينتصر لأسمى شعار
    واحنه محتاجين ركضه اليوم..
    من اجل العراق
    ركضه…..
    بيها نجسد (الياليتنا كما معاك )

    الشاعر/عارف مأمون/الناصريه

  10. اهل الناصريه كلهم مبدعون.واصحاب تاريخ طويل برفد العراق بجميع انواع الفنون والاداب والسياسة والعلوم التطبيقيه الاخرى.وللتاريخ شواهد كثيره ﻻيمكن تجاوزها.اذا مااردنا ان ندخل في حسابات التفاضل والتفاخر مع الاخرين..واهل الناصريه لم ولن يكونوا يوما معدان.ولا بدو.ولا اي تسمية اخرى..غير اهل الغيره والحميه والنخوه والحضاره .اما معداان فليعذرني الشاعر والناشر من عدم تقبلها.نعم كتب الاديب والباحث الكبير سليم مطر سيرته الذاتيه تحت عنوان (اعترافات رجل ﻻيستحي) واكد انه (شروكي) ولم يقل معيدي .فالشروكي صفة لمكان اونسبه لاتجاه.وهذا ليس عيبا.ولكن ان ينتسب العربي المسلم الى (الاعراب)الذي ذمهم الله في كتابه الكريم.ويرى بعض اللباحثين في هذا المجال ان البدو هم اعراب الصحراء .والمعدان هم اعراب اطراف الحواضر او المدن.اذا ينبغي لنا ان نتوقف قليلا قبل ان نتبنى ما ليس فينا ..وان لانركب موجة الصحفي محمد اﻻخرس واندفاعه الغير مبرر باتجاه تبني هذه الصفه.والبحوث في هذا المجال ﻻزالت جاريه لحد اﻻن من النواحي البايلوجيه والسايكولوجيه .فانتظروا ونحن معكم منتظرون..ولا تتعجلون بتبني الجنون…؟

  11. واريد ان اوضح اكثر للاخ الشاعر..لم يذكر لنا ابن خلدون في تاريخه شئ عن المعدان.ولم يتطرق لهم حنا بطاطو.ولم نسمع لهم ذكر في كتب فاح عبد الجبار.ولا عند رشيد الخيون.ولافي بحوث عبد العزيز النوار.ولاوجود لهم في تاريخ علي طاهر الحمود .وﻻفي تاريخ فيليب ويلارد..ولا وجود لهم في جميع كتب العلامه الكبيرعلي الوردي..&اذا من اين جيئ بهذا التوصيف والسق بهذا الشعب الاصيل؟سؤال عند الاجابة عليه ينبغي ان نلجا الى الواقع في القبول او الرفض..مثلا..هل نستطيع ان نقول لشيخ عشيره ما انت معيدي.؟وهل يحترم الرجل في ديوان عشائر اذاما اعلن انه معيدي؟وهل من حق الرجل المعيدي اصلا ومهنة ان ينتمي الى قبيله عريقه؟وهل يقبل احد ان يذيل اسمه بلقب المعيدي بدلا من لقب عشيرته المحترم؟ درج العرب على قول كلمة والنعم اذا ما ذكر الرجل اسم عشيرته..فهل تقال هذه الكلمه للمعيدي عندما يطرحها متفاخرا.؟اذا حتما هناك فرق وهناك شئ غريب يعمل البعض على دسه .لاغراض اخرى.كان يكون اخراج القبائل العربيه في هذه المناطق من اصالتها وانحدارها.فالمعدان شريحه اقتصاديه وعرقيه تعيش في اطراف المدن بسبب تربيتهم للجاموس تحديدا .ولهم عادات وتقاليد مختلفه.ولهم نظرة مختلفه في مشركة النساء بالعمل.وﻻيؤخذ منهم نساء الاما شذ عن العرف .وﻻيزوجون من الاصايل.اي بنات الاصول.واذا التقيت الشاعر وقلت له انك معيدي سوف يقتلني على الفور وبلا تردد.لانني انسبه الى اوطا من مكانته الحقيقيه.هذا هو الواقع وﻻتسحبوا الناس الى ماﻻترضوه ﻻنفسكم.وابتعدوا عن تبني الواطئ.فهذه مؤامرة تحاك ضدكم .في اماكن لازلتم تحترموها..ؤسبب المذهبية .ومروجيها رجال تحترمون مكانتهم الدينيه والاجتماعية..لكي يتفاخروا عليكم بالنسب.وﻻتتفاخروا انتم به عليهم.اصحوا وصححوا.يهديكم الله..وتوقفوا عن السير وراء كل ناعق .لانني احترمكم واحبكم اكتب لكم من بعيد .تحياتي لمثقفي العراق عموما والناصرية خصيصا.والسلام ختام…

  12. اتذكر المرحومة اكميلة قبل ستة سنوات رحمة الله على روحها الطيبة
    قصيدة الحاج والدها تدمي القلب والروح والله جدا مؤثرة ومعبرة

    ارجوا من الاخ كريم ادراجها في معرض حقوق الانسان في جنيف لوزارة حقوق الانسان العراقية مع الشكر والتقدير

  13. محروك كلبه

    يكفينا شعر وهتافات وهوسات !!!!تره القضية صارت قضية وجود الشيعة في العراق او لا وجود !!! يمعودين تحزموا تراهم ناويهه نية شر !!!ونامو على التفك….

  14. عباس الصافی

    قصیده صح معدان انی سجلتها بصوتی قبل سنه وسمعتها للاخوان هنا فی خارج العراق ولکن یاریت اسمعها بصوت المبدع ابن النصریه مدینه الابداع عارف مامون هذی طلبی من شاعرنا الکریم ان نسمعها بصوته اذا امکنوکذلک ای قصائد اخری

  15. صح لسانك يا عارف يا مأمون… وتبقى زقورة اور شاهد على شعب متحضر ومبدع .

  16. عارف مأمون

    احبتي..السلام عليكم..
    من دواعي سروري واعتزازي ان تحظى كتاباتي وقصيدتي هذه بأستحسانكم واجد عبارات الاطراء التي استشف منها صدق مشاعركم ونقاء قلوبكم..
    صح معدان كتبتها في حالة ثورة ضد شخص اراد النيل من اهل الجنوب الاصلاء وهي رد حقيقي على موقف حقيقي لذلك كانت واقعيتها طريقا لقلوب الكثيرين من شرفاء وابناء العراق الغيارى..
    وللاخ عباس الصافي اقول له شكرا جزيلا والقصيده قرأتها اكثر من مره في اماسي شعرية ومسجله ولكن ليس بيدي حاليا وحال الحصول على التسجيل سأنشره..
    شكرا جزيلا لكم احبتي ولموقع شبابيك الذي اكن له كل الحب والاحترام لاته يمثل صوت الشرفاء والحريصين على بلدنا العزيز

    عارف مأمون

  17. رافضية من اهل الجنوب

    انك تكون معيدي او شروكي يزيدك شرف مو سني بعثي قجقجي و بعد اكثر قاتل مجرم و حاقد مثل اولاد هند و ابو سفيان لعنة الله على الظالمين

  18. عراقي حتى النخاع

    الشاعر عارف مأمون –صح لسانك وروحك يامبدع وياكريم قبل قليل قراتها القصيدتان ثق الدموع كانت تنهمر من عيوني ولا استطيع ان اتقف –اهل الناصريه هم قطعه من العراق —والعراق جسد وهل يتنازل الجسد من قطعه منه بارك الله فيك ومزيدا من هذه الاشعار التي تقع في القلب لانها نابعه من القلب . ليباركك الله يااخي —واتحفنا يمثل هذه الدرر.

  19. عبد الزهره

    ندمه من اطيح دمعه..
    وماكو ادين
    وفشله من اجوع عمرك..
    وانت ابن الرافدين
    الجوع كافر..
    يعني كفار التجوعك
    الدين امان..
    يعني كل واحد يخوفك
    ماله دين !
    راح اصاحب عنكبوت
    عنكبوت !!
    بلكي يبنيلي ولو بالشجره بيت !
    وراح ادخل دوره باقفاص البلابل
    بلكي اتعلم لغه مابيهه موت
    وصوتي يتحول نشيد
    حتى من اغضب اغرد..ما اصيح !
    وما اصرّخ باعلى صوت
    وكون ترهم ابني مادخله مدارس
    بيهه يتعلم جذب ضمن المناهج
    يقره دار…
    وعمره يبقه بلايه دار!
    ويقره جارك ثم جارك ثم جارك ثم اخاك
    وجار يذبح جار والموضوع عادي !
    واللطيفه..والطريفه..والمصيبه
    ابني عبد الزهره يقره
    الوطن واحد
    الشعب واحد
    الدين واحد…
    وفتوى تصدر بيه ميطب الرمادي !!
    …من قصائدي
    تحياتي وتقديري لشبابيك الرائع ولكل نفس خيّر ومحب للعراق

  20. جنوبي
    الى النكره طه اللهيبي

    يلهيبي الحچي ميّكبر الانسان
    ولا عمر الصياح يحقق الغايه
    حط جدك اكَبالي وجدي يحجي وياه
    وراح نشوف ياهو اليرفع الرايه ؟
    اشعندك انت كَلي من الاصل شتكون؟
    حتى اتمس اصولي وتفخر بهايه !
    آنه ابن الكتب اول حرف بالكون
    بوكت جدك تغوغي بحلكَه الحچايه !
    بوكت اعمه كَلب وعيون يبن لهيب
    آنه الشرّعت للناس القرايه
    مابات اعله كَاعي المحتل وذليت
    بالعشرين ألي الشاهود والرايه
    ماعيّرك ولك مو انت كلك عار
    يلمخلي خواتك راحن سبايه
    باجر جم اصل عدّك تفاخر بيه ؟
    كثرن والدواعش كَلبو الأيه
    من ياعرب انت وصاحبت شيشان
    قوقاز وترك وافغان چم سايه ؟
    ولو تشبچ عليك وضعت بين البين
    مادام اعله بيتك طبّوا اهوايه ؟!
    مو مثلك ولك ماراضي انه بهاي
    شالتني الحميه ورايح عنايه
    استرلك شرف يالماسترته بيوم
    واطهّر بيت ابوك وثوب الولايه
    ضحايانه التطيح بكَاعك شيردون ؟
    غير تصون عرضك من الحيايه !
    جنوبي آنه الاصل والفصل والتاريخ
    واسكّت من يريد يشوه الثايه
    ………..

    اعزائي ..اخص موقع شبابيك الرائع بهذه القصيدة التي انتهيت منها للتو
    وهي رد على تخرصات النكره طه اللهيبي..
    ارجو ان تنشر بصفحة منفرده لان موضوع القصيدة يستحق ذلك
    لأني ارسلت قصائد على ايميل الموقع ولم تظهر
    مع فائق الشكر والامتنان
    الشاعر/عارف مأمون/الناصريه

  21. قصيدة لقصة واقعية
    زوجة غانم…
    ابكتني قصتها فكتبت من اجلها

    أنها زوجة لاحد ضحايا الارهاب الذين زهقت ارواحهم ظلما بعد احداث العنف في العراق عام 2005
    تحدثت بمرارة بمقال عن حالها وحال اطفالها الثلاث..اصغرهم (مصطفى) كانت حامل به وولد بعد شهرين
    من استشهاد والده..اشد مايؤلم في قصة هذه المرأة تقول ان اولادها لحد الان لم يصدقوا موت والدهم ويتحدثون عن عودته وعند نجاحهم في المدرسة نذهب لزيارة قبره ويأخذون (الشهايد) معهم لغرض اخباره بنجاحهم ويتحدثون مع القبر فكانت هذه الرثائية لقصة حقيقية يشهد الله تبكيني كلما رجعت اليها..

    صباح الخير بابه اشعجب ماريدت..
    صار سنين منك ماسمعناها ؟
    نجحنه اول نبشرك جينه متعنين
    بلهفه والشهايد ليك جبناها
    هذني اخدودنه اعله الكَبر محطوطات
    بوس اخدودنه البعدك نسيناها !
    من ماي الورد اكثر نطش دموع
    وفيضنه الكَبر لمن بچيناها
    اكعد بويه اكعد امنه راح تموت
    حلفت تبقه يمك لو تجي وياها
    هاي أمنه الكَبل عدّك بعز الروح
    معقوله الكَبر خلاك تنساها ؟!
    وابنك مصطفى يعتب عليك هواي
    منك بس صور بالبيت شافاها
    مابطل سؤاله اشوكت بابه يعود
    محد كَبله هيج السفره سواها !
    وحدنه بوكت غادر عفتنه شلون
    المذله خلاف شخصك ياما شفناها ؟!
    وقعنه الشهايد فدوه بابه ارجوك
    حقل اسمك فراغ شلون ترضاها !!
    تعال اويانه ارجع يمنه نام هناك
    هاي المكَبره اتسكت ضحاياها
    بيتك ماله باب المكَبره بلا باب
    ماتقبل نشوفك هاذه معناها
    سمعنه من البعض كالوا ابوكم مات
    وغضينه النظر چن ما سمعناها
    الزفّك للكَبر مسلم تكَول الناس
    ومن منّه خذاك الشغله افتاها
    وكَبل لاصله يمكن شح عليه الماي
    توضه بدم بريء وراح صلاها !!
    …………………
    نشرتها قبل سنوات في عدة مواقع الكترونيه
    واعيد نشرها لان قوافل الشهداء لن تتوقف في بلدي المظلوم
    عارف مأمون
    …….
    ملاحظة ارسلت القصيدة على رابط الموقع لكنها لم تظهر لا اعرف ان كانت هناك مشكلة في الرابط ام تم تغييره ؟! تحياتي وتقديري

  22. عاش هذا النفس العراقي الوطني ورحم الله شهدائنا الأبرار ولعن أعدائهم من الأولين والآخرين بحق محمد وآل محمد الطيبين الطاهرين .

  23. عارف مأمون

    المهمّش !!

    ياهو الهمّشك من الله لاينطيك
    مربّع بالعراق وتصرخ مهمّش ؟
    قسمنه وياك كلشي النفط والتمرات
    ونفديك بنفسنه مرار من ترمش !
    نبنيلك وطن وانت بصلافة عين
    كلما ساس يعله بچفّك تفلّش !
    فضلّت اعله اخوك التركي والشيشان
    ودخلته اعله بيتك خاف يستوحش !
    دنّس كلشي بيك وانت راضي بهاي
    بس أحنه الغيارى بهاي نسحگ عش
    معدان وفخر من ننحسب معدان
    المعيدي اصاله وانت بيك الغش
    شفتنه شلون نفزع فزعة الشجعان
    بوكت ربعك نسوك وأيّست كلش !
    لبعمان صبّح ولشرد لأربيل
    وترك بيك الدواعش والكفر ينهش
    متروسين غيره ونخوه من عباس
    مابينه اللزم سرگيهن ويرعش
    انساگن للاسف نسوانكم للذيب
    وچبيره اعله الجنوبي يشوفها ويسكت
    اخو خيته وعلي هد هدة الخيال
    مو چن بالرمادي ابيته چن حلّت !
    المعدان الشفتها شلون فزعوا ليك
    كَبل نگلة جدمهم روحهم وصلت
    ماختلوا ولك لو فخخوا حيطان
    تلكَوها بصدرهم والگصص لمعت
    اجوك بصف رصاص وهامه فوك الغيم
    مو مثل الجبتهم دوني ومسربت
    اجوك بلا قناع وجوهم عنوان
    وكَاعك من غزوها بدمهم تروت
    عارف مأمون

  24. عيد الحب ام ….؟!
    خل احس بالحب واعيشه وحطلي عيد..
    شلون عيد الحب ترهمه بمكَبره ؟!
    المايشوف الحال چن مثل الضرير…
    وفوگ مافاكَد نظر حط منضره !
    آنه عيني اعله الدرب تنطر اخوي
    مو يجي يمشي بنعش اتنطره !
    وجاري من يومين زف ابنه الوحيد
    واللطم بعده اسمعه بچادره
    شرد اسولفلك شوارعنه الدليل
    لافتات السود تشرح ماجره
    محمّره وحده وخذت منه رجال..
    اليوم عدنه بكل كتر لمحمره !
    آنه ضايعلي وطن وتكَلي عيد ..
    شنهو بعد الضاع يمكن نخسره ؟!
    الموت لو يرهم أله عيد ويصير..
    هذا يشملنه وعليه نلزم سره !!
    عارف مأمون

  25. عارف مأمون

    گصّر السانك…
    الى كل المتقولين على الحشد المبارك:

    وانت شنهو بدونهم يل دنگيت
    ذوله سترك يلي ماعندك ستر !
    وصلت لبيتك امس داعش يهاذ
    وين چان السانك الطوله متر ؟
    نسبلت وكت التفگ مثل الذليل
    ومن وصلت النفهه تتحول شتر ؟!
    اشجابك انت اعله الحشد ذولة الرجال
    لوذ بيهم يلّي لذت بكل كتر
    گصّر السانك يبو السان البذيء
    لاتره بسيف المراجل ينبتر
    ………
    تحياتي ومحبتي لادارة شبابيك الرائعة
    وارجو تزويدي بالرابط والعنوان الذي يمكن ان ارسل عن طريقه مشاركاتي الجديدة بدلا من نشرها ضمن هذه النافذة التي اعتز بها كثيرا ..مع فائق الود والتقدير

  26. عارف مأمون

    عاصفة الحشد الشعبي

    عاصفتنه العاصفه حزم وأباء
    صدّت العدوان بالغيره وهمم
    موش لملوم العرب اهل النفاق
    وعل الفقير ال باليمن صارو زلم
    استصرخت قدس العرب بيكم چثير..
    وانتوا سكته بلا نفس مثل الصنم
    موش بس ابليس اترجمه الحجيج
    انتو هم شيطان يستوجب رجم
    هسه صرتو ارجال يشباه الرجال
    كون بيكم خير ساويتوا الامم ؟!
    الباع منكم دينه بفلوس الحرام
    وبيكم يبيع العروبه ويستلم !
    اليهتم ويبچي اعله حرية الشعوب
    بالبداية يشيل عن شعبه الظلم !
    البطل موش اعله اخوه يطلع شجاع
    ومن يخوفه الاجنبي تشوفه قزم
    العده طيارات وسلاح ورجال
    خل يكض بيته كَبل لاينهجم
    اليحمي شرعية اليمن شرعي يكون
    موش حاكم شعبه عبالك غنم !
    وكون يحكم مرحله ويفسح مجال
    مو قبل الاسلام مستلم الحكم !!
    ماشفت من العرب موقف شريف
    لأن مابيهم ولاواحد شهم!
    ……..
    عارف مأمون/الناصريه

  27. عارف مأمون

    الثرثار

    عشره استشهدوا يطلابة الثرثار
    عليمن هلصياح وخبصه يوميه ؟!
    عشرين ام وابو نفترض نص عشرين
    انفجعوا شنهو يعني العشره اهمية !
    اتيتم چم طفل چا عجبه عدنه ايتام
    المقابريتّمت لو هم فضائيه ؟!
    انكَول تحاصروا قابل جديده تصير
    شعب كامل محاصر من حراميه !
    انعافوا للذبح چم نفر وتزعلون
    گبلها سبايكر الف وسبعميه !
    العبيدي منيله ؟ سلاح المشاجب راح
    ضلت بس لأثيل وربعه جيسيه !!
    الموصل مو زلم ومشوربه الانبار ؟
    وامس وكت التظاهر كلها نشميه
    بس طگ التفگ صبحوا يم بغداد
    وكل واحد يگل للثاني شعليه !
    مو قادم امس صيّح علي سليمان
    غمّك ماتجي تعاين الغربيه
    وصل طشارهم يمنه وفتحنه گلوب
    گبل بيوتنه الصارت انباريه
    التنعتهم امس فرس وعجم وهنود..
    حموا عرض التركته اوي الافغانيه !
    مانحسب فضل واجبنه نحمي البيت
    بس كون المقابل ينظف شويه
    مو رجل بقطر والثانيه باربيل
    وجيب وعقل مملي من السعوديه !
    وايد معلگله بالمنطقه الخضراء
    وايد اتفخخ وترسل ارهابيه !
    عليمن نختلف وندوخ بالثرثار
    عشره استشهدوا عشرين لو ميه
    مادام الحبل يا ساده عل الجرار
    شيهمنه الرقم والموت يوميه ؟!

  28. الولاء

    اليبدل كَلبه ببيض افضل من الثوب
    اذا ابيض كلب ماتنرد اعماله
    يعرف بالصدك قيمة محبة احسين
    وعليمن من طلع باصحابه وعياله ؟
    اليأكدلي محبتك مو اثياب السود
    افعالك ياموالي التثبت الحاله
    الحسين اصلاح ناده بيوم عاشوراء
    مايقبل عمل من ايد نشاله
    الچفه ابيض ولويخدم بخبزه وماي
    افضل من حرامي ويكرم فياله
    اليكرر كل وكت ياليتنا وياك
    يكدر بالحقيقه ايجسد اقواله
    هسه ال بالحشد جسّد صدگ لبيك
    لسبعين الحسين نضاف هنياله
    الولاء بلا فعل ما يصنع التاريخ
    اليهد بطرگ اديه ايريح چتاله !
    السوالف تنحچه بلسان ياهو الچان
    الموقف يختلف نستذكر ارجاله
    من تسعين عام وينذكر شعلان
    ولان صنعت نصر ماتنسي الفاله

    عظم الله لنا ولكم الاجر بذكرى ثورة الاحرار وانتصار الدم على السيف في معركة الطف الخالده..واهديكم هذه القصيدة قبل نشرها او قراءتها في اي مكان اخر اعتزازا بموقع شبابيك الرائع

  29. حزام 2016 …
    بمناسبة العام الجديد

    شخذت مني السنه وشتأمّل من الجاي..
    وگالوها الكتاب يفسره عنوانه
    وسنتنه الجايه بذيل المشت تنگاد
    يعني بكل صراحه هواي تعبانه
    شدّو حزامكم مجبل علينه الجوع
    عبالك بالبلد ماعدنه جوعانه !
    يمن سديت بابك والوطن ينباگ
    ربك مايسد عل الناس بيبانه
    سد كاك النفط غرّگت كردستان
    ومجوّع شعب تاريخ عنوانه
    لربعك فصلت هذا العراق اثياب
    وبس لاهل الجنوب اتفصل اچفانه !
    يحاكمنه الفطن يا قاده يا نواب
    يا شيخ ومعالي اهنا يمولانه
    شنشد من حزم غير احنه متحزمين
    واذا شاهد ردت احسب ضحايانه ؟!
    عل طول السنه انزف للوطن شبان
    بكثر ما بالفنادق ساسه سكرانه !
    دخيلك (16) جبناها ضيم بضيم
    نريدك عام رحمه وتلطف ويانه
    العراق بريل تايه والدرب مجهول
    وكل واحد يدير بكيفه سكانه
    نريدك عام رابح حتى نفرح بيك
    شبعنه من السنين الكلها خسرانه

    نسال الله ان يكون عام خير وامن وسلام على بلدنا العزيز
    وعلى اسرة شبابيك الرائعة

  30. عارف مأمون

    مباراة الحكومه
    غيروها الخطط بلكي الحكومه تفوز…
    امبارك بس هدف ضد الارهابيه
    مو معقوله نلعب صار حفنه سنين
    اذا ناخذ هدف الارهاب ستميه !
    موصوج الحكم لو علّه بالجمهور
    الخلل باللاعبين اختلفت النيه
    البعض يلعب خشن والبعض مو هداف
    البعض يلعب اناني ومو جماعيه
    البعض يطلع تسلل للحدود يريد
    يسجله هدف من دون شرعيه
    البعض فاقد لياقه وتعب نص الشوط
    البعض ماخذ منشط ميه بالميه
    البعض جايب مدرب من جوار الشوم
    خبرته بالمفخخ مو رياضيه !
    مدرب مانريد وخطه من جيران
    جيران العراق ادز حرامية
    وجيران العراق اتعد خطط للموت
    اما بلعبة للحب مو استاديه
    نريد من العراق الخطه والتدريب
    ولا بأس استفادوا بخبره غربيه
    شارة كابتن نطيها للعقّال
    اليحب روح الجماعه وعنده عقليه
    المايلعب اساسي الفرصه ماتجزاه
    بعد عدنه لعب واشواط اضافيه
    مباراة الحكومه نريد منها اهداف
    تعبنه من النتائج كلهه سلبيه
    ماقصّر شعبنه ويلسياسيين..
    وصلهم بصابع للنجوميه
    ….
    من قصائدي المنشوره ..اعيد نشرها للفائدة والتذكير ليس الا..!

  31. عارف مأمون

    يابو يسر
    مقدمة
    هذه القصيدة النقدية المباشرة البسيطة قد يحسبها البعض لي والاخر ضدي
    اخاطب بها مسؤول الرعية الاول بعد ان ضاق الافق وقلة الحيلة !
    عليه تحملني وتحمّل كل من يبدي رأيا بنية خالصة تطلب الاصلاح
    ونحن اتباع مدرسة اصلاحية كبرى خطها امامنا الحسين بدمة الطاهر
    يابو يسر..يابو يسر
    جبناها من عسر العسر
    من ضيم ابو الحفره الزفت
    لهساسه هاي التوهه اجت
    خلونه گعده اعله التخت
    كلنه سوه جمع بكسر
    يابو يسر !
    نواب كاتلها الشبع
    تاكل وماتطي الربع
    لزگت ابد ماتنشلع
    عل الكرسي واحدهم نسر
    يابو يسر
    بالمنطقه الخضره الزلم
    متحزمه للبوگ وتلم
    ومن يحچي واحدهم فلم
    اتحسبه مخترع الجسر
    يابو يسر !
    ماكو بعد منكم امل
    كل مانسولف ينهمل
    وصلت بعد ماتنحمل
    صار الحچي ماله فسر
    يابو يسر
    معقوله مركون الشهم
    والداعشي بنص الحكم
    الكرسي بالواقع اهم
    الفقره هيّن تنخسر
    يابو يسر
    انهض يحاكمنه الفطن
    السكته ترفس بالبطن
    انباع تفصيخ الوطن
    من هاي شكثر ينخسر ؟
    يابو يسر !
    ظلت علينه المسأله
    اليختار باچر نسأله
    اختار السياسي اليعدله
    لو يرجع النفس الكسر ؟
    يابو يسر

  32. عارف مأمون

    أنا سعودي !
    الامم والشعوب تفتخر بأنجازاتها وما تقدمه من خدمة للانسانية
    ومملكة ال سعود الوهابية تصدر القتل والدمار والارهاب للعالم
    بالامس فجر اثنان من شواذها اجسادهم النتنة بين الابرياء في محافظة السماوة
    ضمن مسلسل طويل من القتل والتدمير الذي تتبناه مملكة الشر والتكفير
    في كل انحاء العالم..
    انا سعودي انا سعودي
    نابت عل الحقد عودي
    انا سعودي انا سعودي
    افجّر واذبح بزودي
    انا سعودي انا سعودي
    ارهابي وتشهد جدودي
    انا عربي اسم ينكال
    واصلي مأكد يهودي
    ربعي الاعز بنيامين
    سليم وكاكه مسعودي !
    مسلم ماعرفت اسلام
    ملك سلمان معبودي !
    انا سعودي ابن وهاب
    تثبت ملتي شهودي
    انا سعودي اصدر ارهاب
    تجاره وفاتح حدودي
    أنا سعودي ابو البترول
    من نفطي صنعت شكول
    (من كل زيج رگعة ) تگول
    هيچ ململم جنودي !
    آنه الذابح الاطفال..
    آنه المغتصب نسوان
    آنه الطشرت بلدان
    لحّد ينسه مجهودي ؟!
    أنا سعودي أنا سعودي
    ….
    على وزن (انه شروگي) وشتان بين هذا وذاك !

  33. عارف مأمون

    غم رايكم
    حاولت ان اغض النظر واتجاوز الصورة(1) لكني لم استطع:
    اعتذرولها..
    كرديه هاي لهسبب رحتولها
    من تزعل عليكم زعل..
    مسعود متگدرولها
    هيچ اعله (شحاطة ) الزعل
    اشحال كون حجولها ؟!
    الفقره متهمكم ابد…
    مكدوره وتكدرولها !
    الفقره هينه حمولها !!
    مايعتذر مسؤولها
    الجاعوا..الماتوا..مو مهم
    تجوع وتموت بزولها
    بس وكت ماصاروا عدد..
    واصوات دنگتولها !
    غم رايكم ذوله الحموا..
    اشوارب سياسه اشطولها !
    غم رايكم ذوله زلم..
    اطيحون لوما خيولها
    من داعش انتهكت عرض
    وبيوتهم طبلوها
    بأربيل شو شرده الربع
    وزلامنه الفزعولها !

    (1) صورة علي العلاق وهو يقدم الاعتذار للنائبة الاء الطالباني

  34. عارف مأمون

    يهل الدار

    مشهد…
    من مأساة الكرادة :

    يهل الدار..؟
    ها عدليين ..ها ميتين ؟
    اشم ريحة اعزاز
    بريحة الدخان !
    شنهو الصار ؟
    اشوف على الدرج كذله
    وعطر مكسور
    ولا صوت وهله…
    من غرفة الخطار !
    البخور اشماله يخنگ
    شنهو غلطانين…
    شعلتوا بداله
    لعبة من لعب الازغار ؟!
    اجه وكت السحور
    ونومكم بيه خوف
    وبو طبيله احس هلمره دگ انذار !
    واسمع صوت (عجّل)..
    موش صوت اسلام
    دخيلك ربي هذا الصوت للكفار !
    شنو بس لا رجع للديره ابو سيفان ؟
    واحنه بلا محمد.
    لا علي الكرار !
    بس لا (ابرهه ) رد من جديد انوب
    وتحزم علينه بعبوه مو بأفيال !
    بس لا حرمله والشمر موجودين
    وتكاثر نسلهم..
    صار هسه اجيال ؟
    يهل الدار…………………..!
    أنبگتوا بسد وطن
    ناطوره مامهيوب
    وعلى دمكم اسف يتأمن الحيّال !!
    …..
    الاخوة الاعزاء..في ادارة شبابيك الرائع..ارجو اعتماد القصيدة كاملة حيث سبق وان نشرت جزء منها في تعليق على احد مواضيعكم التي تخص جريمة تفجير الكرادة..واخص شبابيك الرائع بها قبل نشرها في اي موقع ومكان اخر مع وافر محبتي وتقديري
    *******
    بخدمتك يا شريف يا ابو الغيرة العراقية

  35. الحاكم
    ونحن في اجواء عيد الغدير الاغر

    علي ماشمل روحة بامتيازات..
    ولا عاش بقصر وكت الخلافه
    بيت المال بيده وما أخذ مال..
    خشن مأكل وملبس مو ترافه
    سروره يصير من يطعم يتاماه…
    الرعيه بوكته ماشافت كلافه
    ماغرته الدنيه الجبلت عليه…
    علي من صار حاكم ما تعافه !
    وينه اليقتدي ويعرف ابو حسين..
    بفعل مو بس سوالف للصحافه
    الشيعي اليحكم وماينصف الناس
    شنو عن داعش بهاذي اختلافه ؟؟
    وين اليحكم وصاحب عقل كون…
    مو بس حاكم بربطة وقيافه ؟!

  36. عارف مأمون

    الى أثيل النجيفي :

    هي هاي السالفه المابيها خير..
    الموش زلمه يعلي صوته اعله الزلم
    البايگه العنبه شلع يطلع شريف ؟؟
    ويدّعي بسله وعنب صار القزم !
    الباع بيته واطه بالشرده اللهيب..
    كضله تفگه وگام بجيوبه يلم
    روح شوف بيا كتر ستر الخوات..
    ما أعيّرك بس اذكرك بالفلم !
    المايلاگيها بوكت رادت رجال…
    شلّي بيه محرب اذا صارت سلم ؟!
    اتبع خيولك أخذهن اردوگان…
    تدري وي داعش صديجك منسجم
    تحلم تعوعي ترد… أذّن بلال
    والفجر لمن طلع فز الحلم

اترك رداً