تسجيل الدخول
اسم المستخدم :

كلمة المرور :

تذكرني



كلمة المرور مفقودة؟

اشترك الآن !
من متواجد الآن
9 متواجد (9 في الاخبار)

عضو: 0
زائر: 9

المزيد
أهم الاخبار
 

الخبر السابق الخبر التالي صفحة الطباعة ارسل هذا الخبر الى صديق انشئ كتاب الكتروني من هذه المقالة

شبابيك : تحشيشه عراقية حول تهديد اوردكَان بن (ياسمين)!
المرسل في 2012/2/4 6:03:12 ( 2255 القراء )

تحشيشه عراقية حول تهديد اوردكَان بن (ياسمين)!

ظاهر جواد الشمري
zhaher@yahoo.com
الكابتن أردوغان يهاجم الكابتن نوري المالكي بكل صلافة معهودة من حاضر عرس أمه ! بعد أن هرب من ساحة اللعب الحقيقية مع منتخب جيرانه , وكَبله المالكي خابره يسال عن صحته وهاي سوالف العراقيين من يومهم مايعرفون الشماته ويعودون المريض حتى لو كان عدوهم ,وهاي مو جديدة عليهم ، سواهه صلاح الدين الايوبي كَبل المالكي من غط ريتشارد كَلب الاسد بتلاثه بالليل ، ويكَولون من كَعد ريتشارد ولكَه المالكي فوكَ راسه ، كَال : شنو السالفة خسرنه الحرب؟ كَالوله :لا ، هذا جايبلك طبيب يداويك من افكارك المريضة.بس ريتشارد ما سوه مثل ابن ياسمين كَلب الحب ، لان وراهه اتصالحو ، اما ابن ياسمين شو راح زايد وبس عوزه يكَول على العراق حتى لو جان الكَول أوف سايد، حتى يعوض خسارته مع الفريق الشامي الأبرص العنيد.

شنو المشكله ما ادري, يعني يصير أردوغان صاير سني مثلا حاشا للسنة أن يولدوا من بطن (ياسمين) , لو هو يريد مصلحة العراق ؟ اسمعوا يا شيعة العراق وسنته: اذا ما تسمعون هذا اللي راح أكَوله وتخلوه ترجيه بأذانكم تره والله يطيح حظنا وبعد ميت سنة ما تكَوم النه كَايمه , واحنا شلون عاد متقدمين على العالم ونتفلس عل الطرشي حتى نتأخر ميت سنة لي وره !
طبعا ً الكابتن أردوغان مثل ماتعرفون جاي يخوض مباراة مصيرية مع جارته سورية , وذب كل حيله وماي وجهه باختيار اللاعبين , وتدريبهم , وتمويلهم , وانطه العنده والماعنده لرشوة حكام المباراة , والاتحاد الدولي للطوبة , تحت زعامة الحاج بلارتر ، والأخير كلش رشوته سهله خاصة اذا كانت الرشوة مقدمة من الدب العاق لابيه حمودي ابو حواجب , ومن طب ابن (ياسمين) بأرض الملعب راوغ كل المهاجمين والوسط في الساحة ، وما خله شي جدامه ، مثل ميسي ، بس لاعبي الدفاع يخترقهم بجم فيكه ويفوت بيه وعلى الزلم يعلكَهه على رأي الحاج قاسم السلطان الي فلت وره ما علكَت ولليوم ما ندري هو فات ويه الزلم لو خلاها على ولد الخايبه, على كل هاي مو سالفتنه . تدرون شيصير اذا كَول اوردكان , أولا باب النفط مفتوح طلاكَتين , ودولة أتاتورك ترجع عثمانية والله مايخلصنه منها , ويلعب بالأكراد الترك والعراقيين جنبقله على كَولة الشيعة أو جقلنبه على كَولة السنة , واسرائيل حبيبته يصير الوكت الهة عين غطه وعين فراش ,وأحلام كثيرة تراود أردوغي وهو سائر نحو المرمى السوري حتى يكَوّل , وتعرفون احنه من خلال تنظيرات وافكار اخواننا في القائمة العراقية خلال تسع سنوات عرفنا ان سورية هي قلعة الصمووووود والتصديييي العربي الشامل , وبصراحة بالبداية ما افتهمنا خطاباتهم بهذا الصدد , ولكن شويه شويه أو هيدي هيدي على كَولة اهل الموصل، عرفنه أن هذا الخطاب هو عين الصواب , وآمنا بيه مثل ايمان الانبياء والرسل بالله الواحد الاحد ,وما ندري ليش الاخوان كَلبو على سورية وصارت قلعة المو صمود والمو تصدي.وصارت عدهم مثل النطيحه والمترديه ، بس عمي النطيحه والمترديه ما ينوكلن ،شجاكم تريدون تاكلون حرام بكل الطرق مثل ما سوه اوردكان من هجم على المرمى السوري وما حصل غير تكسير ﭽرعانه وكَص اصبعه اللي رفعه قبل يومين على العراق , لان اللاعبين السوريين اقصد المدافعين , اجاهم دعم هرموني غير طبيعي , ومنشطات وكت الشدة , وطبعن هذه المنشطات سبق وان جربهه اللاعبين السوريين في مباراة سابقة حاول الفريق الخصم وقتها تسجيل هدف قاتل ولكن في اللحظات الاخيره اجاهم المدد وانقذهم من خسارة مؤكدة ولكن لمّن وصل امام قوس الجزاء شاف مقاومة شديدة ومو سهلة , لا والنوب يريد يخلص روحة من الكسرات والتفلات ما كَدر , ورجع في اليوم الثاني بكل رعونه وعصبية , وقبل خوض المباراة الثانية مع الفريق العراقي , كَام يشتم ويهدد , فخرج له كابتن الفريق العراقي نوري بكل أريحية ,وبكلام مال واحد مسيطر , ويعرف كل الثغرات الموجودة في الفريق الاردوغاني , وخاصة منطقة شرق الفريق , ومنطقة الوسط , والجزيرة , وكَله ولك أكَعد بمكانك وصير خوش آدمي يابه , والفريق العراقي تره بالشدات ماينكَحم وبالحروب ملوع وماتهز رمشه المدافع ولا الطائرات ,والمالكي واحد من هذا الفريق وتتذكر يوم وكَعت القنبلة عليه لمن جاي على المنصة هو وبان كي مون , وبان كي هذا وكتهه ضم روحه بسرعة جوه المنصة بس ابن الملحة المالكي لم يرمش جفنه من دويها !, والرئيس القائد ابو هدلة علم كل الويلاد على الطكَ وجان يوميه هادنه على دوله وراد ايخلصنه وما كَدر، وتره ما راح نكَلك صم تراب نذريه بوجه سلاحك ! ونترس كل النكَر بالكَاز والنفط , بس انكَلك تره احنه نعرف شنو تركيا، او قارين كتابهه من الجلد للجلد ، ونعرف وين انحط اصابعنه ، اوين انحط رجلينه . وانعرف منين تكَب النار عليك ، وتره جنهه بدت وياك يابن المو حموله.ومثل ما علمنه ابو هدله على الفوتات ، علمتنه القاعدة على الكَبات من جوه ليجوه. فدير بالك زين من لاعبينه ولد الملحه الي جابوا كاس آسيا ، بالمناسبة انت اوربي لو اسيوي ، شو من تروح الى اوربا ويرفضوك ترجع علينه اتريد اتعيد امجادك يمنه. شنو اتعلمت من تاريخك الي انت رفضته بنفسك. على كل ٍ ، احنه راح نكعد لك براس الدربونه ، والتواثي بدينه ، واليجي منكم هادود ، اذا طلع سالم وصحته زينه من يفحصوه يلكَون خمس فجوج براسه.

التقييم: 10.00 (3 اصوات) - قيم هذا الخبر -
الخبر السابق الخبر التالي صفحة الطباعة ارسل هذا الخبر الى صديق انشئ كتاب الكتروني من هذه المقالة


ادرج هذه المقالة في المواقع التالية

                   

 
التعليقات تخص صاحبها ولا تخص ادارة الموقع
الكاتب الموضوع
زائر
بتاريخ: 2012/2/5 19:15  تحديث: 2012/2/5 19:15
 رد: تحشيشه عراقية حول تهديد اوردكَان بن (ياسمين)!
بس لا يكون هذا اخر مقال ممتع ممتع ومسلي وهادف ويرفع الهامة ليفوكَ بعد مانكسهه الهاشمي وعلاوي
أكتب رد
زائر
بتاريخ: 2012/2/4 19:56  تحديث: 2012/2/4 19:56
 رد: تحشيشه عراقية حول تهديد اوردكَان بن (ياسمين)!
حلوووووووووووووووووووووووه والله كلش حلوه عاشت ايدك بعد اخوك وهذا اوردغان يبنن عمي يردس حيل الماضايكها
مايدري امهاتنا رضعنه من ثداياهن بارود من ثورة العشرين ظلينه ازواج ونقاتل المحتل والجماعه كعدو على الكراسي لحد الان


اخوكم السنشيعي --حلوه مو
أكتب رد
زائر
بتاريخ: 2012/2/4 9:50  تحديث: 2012/2/4 9:50
 رد: تحشيشه عراقية حول تهديد اوردكَان بن (ياسمين)!
أردوغان يريد يعيد خراب الامبراطوريه العثمانيه للوجود؟وصاير الشرطي الجديد للمنطقه؟وبمساندت الاوباش حكام الخليج والوهابيه القذرين؟
أكتب رد

محتوى شبابيك

جميع الحقوق محفوظة لموقع شبابيك المنوع

Powerd by shababek.de